ವಿವ ನ್ಯೂಸ್ ಕನ್ನಡ - ಇದು ಸುದ್ದಿಗಳ ಡಬ್ಬಿ

ವೆನಿಜುವೆಲಾ ಪ್ರಕರಣ: ‘ಶಬ್ದಾಸ್ತ್ರ’ ಬಳಕೆಯ ಬಗ್ಗೆ ಎದ್ದ ಅನುಮಾನಗಳು

ವೆನೆಜುವೆಲಾ ಅಧ್ಯಕ್ಷ ನಿಕೋಲಸ್ ಮಡುರೊ ಬಂಧನಕ್ಕಾಗಿ ಅಮೆರಿಕ ಇತ್ತೀಚೆಗೆ ನಡೆಸಿದ ಕಾರ್ಯಾಚರಣೆಯ ವೇಳೆ ಅತ್ಯಾಧುನಿಕ ಶಬ್ದಾಸ್ತ್ರವನ್ನು ಬಳಸಲಾಗಿದೆ ಎಂಬ ಅನುಮಾನ ಮೂಡಿದೆ.

ಜ.3ರಂದು ನಡೆದ ಈ ದಾಳಿಯಲ್ಲಿ ಅಮೆರಿಕದ ಸಣ್ಣ ಪಡೆಯು ಸುಧಾರಿತ ತಂತ್ರಜ್ಞಾನದ ಮೂಲಕ ವೆನೆಜುವೆಲಾದ ರೇಡಾರ್ ವ್ಯವಸ್ಥೆಗಳನ್ನು ಸಂಪೂರ್ಣ ಸ್ಥಗಿತಗೊಳಿಸಿತ್ತು ಎಂದೂ ವರದಿಯಾಗಿದೆ. ದಾಳಿ ವೇಳೆ ನಡೆದಿದ್ದೇನು?

- ಏಕಾಏಕಿ ಕಿವಿಗಡಚಿಕ್ಕುವಂಥ ಭಾರೀ ಶಬ್ದ ಕೇಳಿಬಂತು - ತೀವ್ರ ಶಬ್ದ ತರಂಗಗಳಿಂದ ಸೈನಿಕರು ಚದುರಿಹೋದರು - ಸೈನಿಕರ ಮೂಗಿನಿಂದ ರಕ್ತಸ್ರಾವ ಆರಂಭವಾಯಿತು, ಕೆಲವರು ರಕ್ತ ವಾಂತಿ ಮಾಡಿಕೊಂಡರು - ಈ ಅಸ್ತ್ರದಿಂದ ತಲೆ ಸಿಡಿದುಹೋಗುವಂತಹ ಅಸಹನೀಯ ನೋವು - ಈ ನೋವಿಂದ ಯಾರೊಬ್ಬರಿಗೂ ಎದ್ದು ನಿಲ್ಲಲೂ ಸಾಧ್ಯವಾಗಲಿಲ್ಲ

ದಾಳಿ ಪ್ರದೇಶಗಳು ಡ್ರೋನ್‌ನಿಂದ ತುಂಬಿಹೋಗಿದ್ದವು. ಅಲ್ಲದೆ, ಈ ವೇಳೆ ಅಮೆರಿಕದ ಪಡೆಗಳು ವಿಚಿತ್ರವಾದ ತೀವ್ರ ಶಬ್ದ ತರಂಗಗಳನ್ನು ಪ್ರಯೋಗಿಸಿದವು. ಇದರ ಪರಿಣಾಮವಾಗಿ ಅಲ್ಲಿದ್ದ ನೂರಾರು ಸೈನಿಕರು ಚದುರಿಹೋಗುವಂತಾಯಿತು. ಸೈನಿಕರ ಮೂಗಿನಿಂದ ರಕ್ತಸ್ರಾವ ಆರಂಭವಾಗಿದ್ದಲ್ಲದೆ, ಅನೇಕರು ರಕ್ತ ವಾಂತಿ ಮಾಡುತ್ತಾ ನೆಲಕ್ಕೆ ಕುಸಿದು ಬಿದ್ದರು. ಇನ್ನು ತಲೆ ಸಿಡಿದುಹೋಗುವಂತಹ ಅಸಹನೀಯ ನೋವು ಉಂಟಾಗಿ, ಯಾರೊಬ್ಬರಿಗೂ ಎದ್ದು ನಿಲ್ಲಲೂ ಸಾಧ್ಯವಾಗಲಿಲ್ಲ ಎಂಬುದಾಗಿ ಪ್ರತ್ಯಕ್ಷದರ್ಶಿಯೊಬ್ಬರು ವಿವರಿಸಿದ್ದಾರೆ.

ಇದು ಮೈಕ್ರೋವೇವ್ ಅಥವಾ ಲೇಸರ್ ಆಧಾರಿತ ಡೈರೆಕ್ಟೆಡ್ ಎನರ್ಜಿ ವೆಪನ್ ಇರಬಹುದು ಎಂದು ಶಂಕಿಸಲಾಗಿದೆ. ಈ ದಾಳಿಯಲ್ಲಿ ಸುಮಾರು 100 ಭದ್ರತಾ ಸಿಬ್ಬಂದಿ ಮೃತಪಟ್ಟಿದ್ದಾರೆ ಎಂದು ವೆನೆಜುವೆಲಾ ಹೇಳಿದೆ. ಶಬ್ದಾಸ್ತ್ರದಿಂದಲೇ ಈ ಎಲ್ಲ ಸಾವುಗಳೂ ಸಂಭವಿಸಿರಬಹುದೇ ಎಂಬುದು ಇನ್ನೂ ದೃಢಪಟ್ಟಿಲ್ಲ. ಅಲ್ಲದೆ, ಈ ಭೀಕರ ದಾಳಿಯಲ್ಲಿ ಶಬ್ದಾಸ್ತ್ರ ಬಳಕೆಯಾಗಿದ್ದು ನಿಜವೇ ಎಂಬ ಪ್ರಶ್ನೆ ಬಗ್ಗೆ ಅಮೆರಿಕ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಚೀನಾ ಕೂಡ ಈ ಆಯುದ್ಧ ಬಳಸಿತ್ತೇ? ಈ ಹಿಂದೆ 2020ರ ಲಡಾಖ್ ಗಡಿ ಬಿಕ್ಕಟ್ಟಿನ ಸಂದರ್ಭದಲ್ಲಿ ಚೀನಾವು ಭಾರತೀಯ ಸೈನಿಕರ ವಿರುದ್ಧ ಮೈಕ್ರೋವೇವ್ ಆಯುಧವನ್ನು ಪ್ರಯೋಗಿಸಿತ್ತು. ಇದರಿಂದ ಭಾರತೀಯ ಸೈನಿಕರು ಅಸಹನೀಯರಾಗಿ ವಾಂತಿ ಮಾಡಿಕೊಂಡಿದ್ದರು ಎಂಬ ಆರೋಪ ಕೇಳಿಬಂದಿತ್ತು. ಆದರೆ ಈ ಆರೋಪ ಸತ್ಯಕ್ಕೆ ದೂರವಾದದ್ದು ಹಾಗೂ ಆಧಾರರಹಿತ ಎಂದು ತಳ್ಳಿಹಾಕಿತ್ತು.

ಅಮೆರಿಕದಿಂದ ಪ್ರತಿಕ್ರಿಯೆಯಿಲ್ಲ ವೆನಿಜುವೆಲಾ ಅಧ್ಯಕ್ಷ ಮಡುರೊ ಬಂಧನಕ್ಕೆಂದು ನಡೆದ ದಾಳಿಯಲ್ಲಿ ನಿಗೂಢ ಶಬ್ದಾಸ್ತ್ರ ಪ್ರಯೋಗಿಸಲಾಗಿದೆ ಎಂದು ವೆನಿಜುವೆಲಾ ಆರೋಪಿಸಿದ್ದು, ಹಲವಾರು ತಜ್ಞರು ಮೈಕ್ರೋವೇವ್ ಅಥವಾ ಲೇಸರ್ ಆಧಾರಿತ ಡೈರೆಕ್ಟೆಡ್ ಎನರ್ಜಿ ವೆಪನ್ ಅನ್ನು ಪ್ರಯೋಗಿಸಿರಬಹುದು ಎಂದು ಶಂಕಿಸಿದ್ದಾರೆ. ಆದರೆ ಇದಕ್ಕೆ ಅಮೆರಿಕ ತಕ್ಷಣ ಅಧಿಕೃತವಾಗಿ ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ.

ಏನಿದು ಡೈರೆಕ್ಟೆಡ್ ಎನರ್ಜಿ ವೆಪನ್? ಡೈರೆಕ್ಟೆಡ್‌ ಎನರ್ಜಿ ವೆಪನ್‌ನಲ್ಲಿ (ಡಿಇಡಬ್ಲ್ಯು) ಲೇಸರ್, ಮೈಕ್ರೋವೇವ್ ಅಥವಾ ಪಾರ್ಟಿಕಲ್ ಬೀಮ್‌ಗಳನ್ನು ಬೆಳಕಿನ ವೇಗದಲ್ಲಿ ಹರಿಸುವ ಮೂಲಕ ಶತ್ರುಗಳ ಡ್ರೋನ್, ಕ್ಷಿಪಣಿ ಅಥವಾ ಎಲೆಕ್ಟ್ರಾನಿಕ್ ಉಪಕರಣಗಳನ್ನು ನಾಶ ಪಡಿಸಲಾಗುತ್ತದೆ. ಇದರಲ್ಲಿ ಕೆಲವು ವಿಧಗಳು ಇವೆ. ಆ ಪೈಕಿ ನಿಗೂಢ ಶಬ್ದಾಸ್ತ್ರವೂ ಒಂದು. ಈ ಶಬ್ದಾಸ್ತ್ರದಲ್ಲಿ ಶತ್ರುಗಳನ್ನು ಹಿಮ್ಮೆಟ್ಟಿಸಲು ಅಥವಾ ಅಶಕ್ತರನ್ನಾಗಿ ಮಾಡಲು ತೀವ್ರವಾದ ಶಬ್ದ ತರಂಗಗಳನ್ನು ಬಳಸಲಾಗುತ್ತದೆ. ಇವುಗಳಿಗೆ ಶತ್ರುಗಳ ರೇಡಾರ್‌, ಸಂವಹನ ವ್ಯವಸ್ಥೆ ಮತ್ತು ಎಲೆಕ್ಟ್ರಾನಿಕ್ ಸರ್ಕ್ಯೂಟ್‌ಗಳನ್ನು ನಾಶ ಪಡಿಸುವ ಸಾಮರ್ಥ್ಯವಿದೆ.