ವಿವ ನ್ಯೂಸ್ ಕನ್ನಡ - ಇದು ಸುದ್ದಿಗಳ ಡಬ್ಬಿ

ಅಸ್ಸಾಂನ ಜನಹೃದಯದ ಗಾಯಕ ಝುಬಿನ್ ಗರ್ಗ್ – ಅಕಾಲಿಕ ನಿಧನದಿಂದ ರಾಜ್ಯವೇ ಶೋಕ ಸಾಗರದಲ್ಲಿ

ಗುವಾಹಟಿ: ಈಶಾನ್ಯದ ಅಸ್ಸಾಂ ರಾಜ್ಯವೇ ಕಳೆದ ನಾಲ್ಕು ದಿನಗಳಿಂದ ದುಃಖದಲ್ಲಿ ಮುಳುಗುವಂತೆ ಖ್ಯಾತ ಗಾಯಕ ಝುಬಿನ್ ಗರ್ಗ್ (52) ಅವರ ನಿಧನ, ಇಡೀ ಭಾರತ ಸಂಗೀತ ಕ್ಷೇತ್ರಕ್ಕೂ ತುಂಬಲಾರದ ನಷ್ಟ ತಂದಿದೆ.

ಅಸ್ಸಾಂನ ಜನರಿಗೆ ಮಗನಾಗಿ, ಅಣ್ಣನಾಗಿ ಬೆರೆತುಹೋದ ಝುಬಿನ್, ತಮ್ಮ 38 ಸಾವಿರಕ್ಕೂ ಹೆಚ್ಚು ಗೀತೆಗಳ ಮೂಲಕ ಜನರ ಹೃದಯದಲ್ಲಿ ಮನೆ ಮಾಡಿಕೊಂಡಿದ್ದರು. ಜನಪರ ಧ್ವನಿಯಾಗಿ ಅವರು ಬದುಕಿನವರೆಗೂ ಜನರೊಂದಿಗೆ ಆತ್ಮೀಯ ಸಂಭಾಷಣೆ ನಡೆಸಿದ್ದರು.

ಅವರ ನಿಧನದ ಬಳಿಕ ಅಸ್ಸಾಂ ರಾಜ್ಯವೇ ಕಣ್ಣೀರಿನಲ್ಲಿ ತೇಲುತ್ತಿದೆ. ಗಾಯಕನೊಬ್ಬನಿಗೆ ಹೀಗೆ ಅಪಾರ ಜನಸಾಗರವೇ ಶೋಕಾಚರಣೆ ಮಾಡಿರುವುದು ಇತಿಹಾಸದಲ್ಲೇ ಅಪರೂಪ. ಮಳೆ ಸುರಿದಂತೆ ನಿಸರ್ಗವೇ ಸಹ ಶೋಕ ವ್ಯಕ್ತಪಡಿಸಿದಂತಾಗಿದೆ.

ಭಾರತೀಯ ಚಿತ್ರರಂಗದಲ್ಲೂ ತಮ್ಮ ಗುರುತನ್ನು ಮೂಡಿಸಿದ್ದ ಝುಬಿನ್, ಕನ್ನಡದ ‘ಹುಡುಗಾಟ’ ಚಿತ್ರದ “ಒಮ್ಮೊಮ್ಮೆ ಹೀಗೂ ಆಗುವುದು” ಹಾಡು ಹಾಗೂ ಬಾಲಿವುಡ್ನ ಜನಪ್ರಿಯ “ಯಾ ಅಲಿ” ಹಾಡಿನ ಮೂಲಕ ದೇಶವ್ಯಾಪಿ ಖ್ಯಾತಿ ಗಳಿಸಿದ್ದರು.

ಆದರೆ, ಸಿಂಗಾಪುರ ಪ್ರವಾಸವೇ ಅವರಿಗೆ ಅಕಾಲಿಕ ಅಂತ್ಯ ತಂದಿತು. ಮ್ಯೂಸಿಕ್ ಕಾನ್ಸರ್ಟ್ಗಾಗಿ ತೆರಳಿದ್ದ ಅವರು ಬಿಡುವಿನ ವೇಳೆಯಲ್ಲಿ ಸ್ಕೂಬಾ ಡೈವಿಂಗ್ಗೆ ಹೋದ ಸಂದರ್ಭದಲ್ಲಿ ಸಮುದ್ರದ ಆಳದಲ್ಲಿ ಪ್ರಜ್ಞೆ ಕಳೆದುಕೊಂಡು ಜೀವ ಕಳೆದುಕೊಂಡರು. ಲೈಫ್ ಜ್ಯಾಕೆಟ್ ಇಲ್ಲದೆ ಈಜುತ್ತಿರುವ ಅವರ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ.