ವಿವ ನ್ಯೂಸ್ ಕನ್ನಡ - ಇದು ಸುದ್ದಿಗಳ ಡಬ್ಬಿ

ಮದ್ಯದಂಗಡಿಗಳ ಲೈಸೆನ್ಸ್ ಶುಲ್ಕ ಹೆಚ್ಚಳ ರದ್ದು ಮಾಡುವಂತೆ ಸಿಎಂ ಬಳಿ ವೈನ್‌ ಮರ್ಚೆಂಟ್ ಸಂಘದ ಬೇಡಿಕೆ

ಹೈಲೈಟ್ಸ್‌: ಮದ್ಯ ಮಾರಾಟಗಾರರು, ಲೈಸೆನ್ಸ್ ಶುಲ್ಕವನ್ನು ಶೇ.100ರಷ್ಟು ಹೆಚ್ಚಿಸಿದ ಕ್ರಮವನ್ನು ವಿರೋಧಿಸಿ, ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರಿಗೆ ಮನವಿ ನೀಡಿದ್ದಾರೆ. 2016 ರಿಂದ 2025 ರ ನಡುವೆ ಶೇ.31.3 ರಷ್ಟು ಲೈಸೆನ್ಸ್‌ ಶುಲ್ಕಗಳು ಹೆಚ್ಚಾಗಿರುವುದರೊಂದಿಗೆ, ಮದ್ಯ ಮಾರಾಟದಲ್ಲಿ ಶೇ.26.90 ಮತ್ತು ಬಿಯರ್ ಮಾರಾಟದಲ್ಲಿ ಶೇ.84ರಷ್ಟು ಹೆಚ್ಚಳವಾಗಿದೆ. ಮದ್ಯ ಮಾರಾಟಗಾರರು, ಚಿಲ್ಲರೆ ಮದ್ಯ ಮಾರಾಟದ ಮೇಲಿನ ಲಾಭಾಂಶವನ್ನು ಕನಿಷ್ಠ ಶೇ.20ರಷ್ಟು ಹೆಚ್ಚಿಸಲು ಸರ್ಕಾರವನ್ನು ವಿನಂತಿಸಿದ್ದಾರೆ.

ಮದ್ಯ ಮಾರಾಟದಿಂದ ಆದಾಯ ಹೆಚ್ಚಿದ್ದರೂ, ಪರವಾನಗಿ ಶುಲ್ಕ ಹೆಚ್ಚಳವನ್ನು ವಿರೋಧಿಸಿ ಮದ್ಯ ಮಾರಾಟಗಾರರು ಸಿಎಂಗೆ ಮನವಿ ಸಲ್ಲಿಸಿದ್ದಾರೆ. ಸನ್ನದು ಶುಲ್ಕ ಹೆಚ್ಚಳ ವಾಪಸ್ ಪಡೆಯುವುದು, ಲಾಭಾಂಶ ಹೆಚ್ಚಿಸುವುದು ಸೇರಿದಂತೆ ಹಲವು ಬೇಡಿಕೆಗಳನ್ನು ಈಡೇರಿಸುವಂತೆ ಕೋರಿದ್ದಾರೆ. ಈ ಬಗ್ಗೆ ಅಬಕಾರಿ ಮತ್ತು ಆರ್ಥಿಕ ಇಲಾಖೆಗಳೊಂದಿಗೆ ಚರ್ಚಿಸಿ ತೀರ್ಮಾನ ಕೈಗೊಳ್ಳುವುದಾಗಿ ಸಿಎಂ ಭರವಸೆ ನೀಡಿದ್ದಾರೆ.

ಬೆಂಗಳೂರು: ಮದ್ಯ ಮಾರಾಟದಿಂದ ಅಬಕಾರಿ ಇಲಾಖೆಗೆ ಆದಾಯ ಹೆಚ್ಚಾಗಿದೆ, ಆದರೂ ಲೈಸೆನ್ಸ್ ಶುಲ್ಕ ಹೆಚ್ಚುಮಾಡಿರುವ ಸರ್ಕಾರದ ಕ್ರಮ ವಿರೋಧಿಸಿ, ಈ ನಿರ್ಧಾರ ಹಿಂಪಡೆಯುವಂತೆ ಮದ್ಯ ಮಾರಾಟಗಾರರು ಸಿಎಂ ಬಳಿ ಮನವಿ ಮಾಡಿದ್ದಾರೆ. ಪರವಾನಗಿ ಶುಲ್ಕ, ಕಾಕಂಬಿ ಮೇಲಿನ ಶುಲ್ಕ ಇಳಿಕೆ ಸೇರಿದಂತೆ ಇತರೆ ಬೇಡಿಕೆಗಳ ಬಗ್ಗೆ ಅಬಕಾರಿ ಹಾಗೂ ಆರ್ಥಿಕ ಇಲಾಖೆಯೊಂದಿಗೆ ಚರ್ಚಿಸಿ ಪರಿಶೀಲನೆ ನಡೆಸುವುದಾಗಿ ಸಿಎಂ ಸಿದ್ದರಾಮಯ್ಯ ಅವರು ಫೆಡರೇಷನ್‌ ಆಫ್‌ ವೈನ್‌ ಮರ್ಚೆಂಟ್ಸ್‌ ಅಸೋಸಿಯೇಷನ್‌ನ ನಿಯೋಗಕ್ಕೆ ಭರವಸೆ ನೀಡಿದರು. ಮುಖ್ಯಮಂತ್ರಿಗಳ ನಿವಾಸ 'ಕಾವೇರಿ'ಯಲ್ಲಿ ಸೋಮವಾರ ಒಕ್ಕೂಟದ ಅಧ್ಯಕ್ಷ ಎಸ್‌.ಗುರುಸ್ವಾಮಿ ನೇತೃತ್ವದ ನಿಯೋಗ ಸಿದ್ದರಾಮಯ್ಯ ಅವರನ್ನು ಭೇಟಿಯಾಗಿತ್ತು. ಸಚಿವ ಆರ್‌.ಬಿ.ತಿಮ್ಮಾಪುರ, ಮುಖ್ಯ ಕಾರ್ಯದರ್ಶಿ ಶಾಲಿನಿ ರಜನೀಶ್‌, ಸಿಎಂ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ಎಲ್‌.ಕೆ. ಅತೀಕ್‌ ಸೇರಿದಂತೆ ಆರ್ಥಿಕ ಇಲಾಖೆ ಹಿರಿಯ ಅಧಿಕಾರಿಗಳು ಉಪಸ್ಥಿತರಿದ್ದರು.

ಮದ್ಯ ಮಾರಾಟಗಾರರು ಹಲವು ಬೇಡಿಕೆಗಳನ್ನು ಸರಕಾರದ ಮುಂದಿಟ್ಟಿದ್ದರು. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರೊಂದಿಗೆ ಚರ್ಚೆ ನಡೆಸಿದ ಕರ್ನಾಟಕ ವೈನ್‌ ಮರ್ಚೆಂಟ್ಸ್‌ ಅಸೋಸಿಯೇಷನ್‌ ಪದಾಧಿಕಾರಿಗಳು ಮೂರು ಪುಟಗಳ ಮನವಿ ಸಲ್ಲಿಸಿದ್ದಾರೆ. ಅದರಲ್ಲಿ ಎಲ್ಲಾಬ ಗೆಯ ಲೈಸೆನ್ಸ್‌ ಶುಲ್ಕವನ್ನು ಶೇ.100ರಷ್ಟು ಹೆಚ್ಚಳ ಮಾಡಿ ಮೇ 15ರಂದು ಹೊರಡಿಸಿರುವ ಕರಡು ಅಧಿಸೂಚನೆ ಹಿಂಪಡೆಯಬೇಕು ಮತ್ತು ಚಿಲ್ಲರೆ ಮದ್ಯ ಮಾರಾಟದ ಮೇಲಿನ ಲಾಭಾಂಶವನ್ನು ಶೇ.20ಕ್ಕೆ ಹೆಚ್ಚಳ ಮಾಡಬೇಕೆಂದು ಕೋರಲಾಗಿದೆ. ಜತೆಗೆ, 2016 ರಿಂದ 2025 ರ ನಡುವೆ 9 ವರ್ಷದಲ್ಲಿ ಶೇ.31.3 ರಷ್ಟು ಲೈಸೆನ್ಸ್‌ಗಳು ಹೆಚ್ಚಳವಾಗಿವೆ. ಅದೇ ಅವಧಿಯಲ್ಲಿ ಶೇ.26.90ರಷ್ಟು ಮದ್ಯ ಮಾರಾಟ ಮತ್ತು ಶೇ.84ರಷ್ಟು ಬಿಯರ್‌ ಮಾರಾಟ ಹೆಚ್ಚಳವಾಗಿದೆ. ಅಬಕಾರಿ ರಾಜಸ್ವಕ್ಕೆ ಸನ್ನದು ಶುಲ್ಕ ಪರಿಗಣಿಸಬಾರದು. ಶೇ.100ರಷ್ಟು ಅಬಕಾರಿ ಸನ್ನದು ಶುಲ್ಕ ಹೆಚ್ಚಳ ಮಾಡಿರುವುದು ಇತಿಹಾಸದಲ್ಲಿ ಇದೇ ಮೊದಲು. ಅದನ್ನು ವಾಪಸ್‌ ಪಡೆಯಬೇಕು ಎಂದು ಮದ್ಯ ಮಾರಾಟಗಾರರು ಆಗ್ರಹಿಸಿದ್ದಾರೆ.

ಉದ್ಯಮದ ಸಂಕಷ್ಟಗಳ ಬಗ್ಗೆ ಸಿಎಂ ಜತೆ ಸಮಗ್ರವಾಗಿ ಚರ್ಚೆ ನಡೆಸಲಾಗಿದೆ. ಒಂದು ವಾರದಲ್ಲಿ ತೀರ್ಮಾನ ಕೈಗೊಳ್ಳಲಾಗುವುದು ಎಂದು ಭರವಸೆ ನೀಡಿದ್ದಾರೆ. ಹಾಗಾಗಿ, ಇದೇ 30ರಂದು ನಡೆಸಲು ಉದ್ದೇಶಿಸಿದ್ದ ಪ್ರತಿಭಟನೆಯನ್ನು ಮುಂದೂಡಲಾಗಿದೆ. ಸಿಎಂ ನಿರ್ಧಾರದ ನಂತರ ಮುಂದಿನ ತೀರ್ಮಾನ ಕೈಗೊಳ್ಳಲಾಗುವುದು ಎಂದಿದ್ದಾರೆ ಬಿ.ಗೋವಿಂದರಾಜ್‌ ಹೆಗ್ಡೆ, ಪ್ರಧಾನ ಕಾರ್ಯದರ್ಶಿ, ಕರ್ನಾಟಕ ಮದ್ಯ ಮಾರಾಟಗಾರರ ಒಕ್ಕೂಟ. ಸಿಎಲ್‌ 7 (ಹೋಟೆಲ್ ಮತ್ತು ಬೋರ್ಡಿಂಗ್ ಮನೆಗಳು) ಪರವಾನಗಿಗಳ ಸಂಖ್ಯೆ 2016-2017 ರಲ್ಲಿ 1,013 ಇತ್ತು. ಇದು 2024-2025 ರಲ್ಲಿ 3,125 ಕ್ಕೆ ಏರಿಕೆಯಾಗಿದೆ. ಸಂಘವು ನೀಡಿದ ಮಾಹಿತಿಯ ಪ್ರಕಾರ, ಪ್ರತಿ ಅಂಗಡಿಯ ಮಾಸಿಕ ಐಎಮ್‌ಎಲ್‌ ಮಾರಾಟವು ಕಡಿಮೆಯಾಗಿದೆ. 2016-2017 ರಲ್ಲಿ ತಿಂಗಳಿಗೆ ಸರಾಸರಿ 504.62 ಕಾರ್ಟನ್‌ಗಳು ಮಾರಾಟವಾಗುತ್ತಿದ್ದವು. ಆದರೆ 2024-2025 ರಲ್ಲಿ ಇದು 485.78 ಕಾರ್ಟನ್‌ಗಳಿಗೆ ಇಳಿದಿದೆ. ಪರವಾನಗಿ ಶುಲ್ಕದಲ್ಲಿನ ಈ ಹೆಚ್ಚಳದಿಂದ ಪರವಾನಗಿ ಹೊಂದಿರುವವರಿಗೆ ಹೊರೆಯಾಗುತ್ತದೆ. ಅಲ್ಲದೆ, ಚಿಲ್ಲರೆ ಮದ್ಯದ ವ್ಯಾಪಾರವನ್ನು ನಂಬಿರುವ ಸಾವಿರಾರು ಜನರ ಜೀವನೋಪಾಯಕ್ಕೆ ತೊಂದರೆಯಾಗುತ್ತದೆ ಎಂದು ಸಂಘವು ಹೇಳಿದೆ. 2016-17 ರಲ್ಲಿ 591.33 ಕೋಟಿ ರೂಪಾಯಿ ಇದ್ದ ಅಬಕಾರಿ ಆದಾಯ, 2024-25 ರಲ್ಲಿ 820 ಕೋಟಿ ರೂಪಾಯಿಗಳಿಗೆ ಏರಿಕೆಯಾಗಿದೆ. ಆದರೆ, ಬಾಡಿಗೆ, ಸಂಬಳ ಮತ್ತು ವಿದ್ಯುತ್ ದರಗಳಂತಹ ವೆಚ್ಚಗಳು ಹೆಚ್ಚಾದ ಕಾರಣ, ವೈಯಕ್ತಿಕ ಮಳಿಗೆಗಳ ಲಾಭ ಕಡಿಮೆಯಾಗಿದೆ ಎಂದು ಹೇಳಿದ್ದಾರೆ. ಶೇಕಡಾ 10 ರಷ್ಟು ಲಾಭಾಂಶವು ಸಾಕಾಗುವುದಿಲ್ಲ. ಆದ್ದರಿಂದ, ಚಿಲ್ಲರೆ ಮದ್ಯ ಮಾರಾಟದ ಮೇಲೆ ಕನಿಷ್ಠ ಶೇಕಡಾ 20 ರಷ್ಟು ಲಾಭವನ್ನು ನೀಡಬೇಕು" ಎಂದು ಸಂಘವು ಸರ್ಕಾರವನ್ನು ವಿನಂತಿಸಿದೆ. ಇದರಿಂದ ವ್ಯಾಪಾರವು ಲಾಭದಾಯಕವಾಗಿರುತ್ತದೆ ಎಂದು ಅವರು ಹೇಳಿದ್ದಾರೆ. ಸಂಘದ ಬೇಡಿಕೆಗಳನ್ನು ಅಬಕಾರಿ ಮತ್ತು ಹಣಕಾಸು ಇಲಾಖೆಗಳೊಂದಿಗೆ ಚರ್ಚಿಸಲಾಗುವುದು ಎಂದು ಮುಖ್ಯಮಂತ್ರಿಗಳು ತಿಳಿಸಿದ್ದಾರೆ.